”Smart vekst” er tema under årskonferansen til NHO Sogn og Fjordane 29. april og Teo Hären er hovudtrekkplasteret. Han er blant dei mest populære foredragshaldarane i Sverige og hjelper personar og organisasjonar til å bli meir kreative. Også gründerar og leiarar i Sogn og Fjordane skal vere med å diskutere ”smart vekst” i Balestrand.

Bakgrunnen er at vi blir stadig færre som skal forsørgje fleire. Mange fell utanfor arbeidslivet. Evna til å tenkje nytt, kombinert med høg kompetanse og avansert teknologi, er noko av det som skal gjere oss i stand til smartare vekst i framtida.

NHO meiner vekst er nødvendig for å sikre velferda. Sjølv om Sogn og Fjordane er eit spennande fylke med bedrifter som har vore vant til å ta omstilling og leggje grunnlag for vekst og verdiskaping, krev framtida nye løysingar.

På NHO Sogn og Fjordane sin årskonferanse 2010 på Kviknes Hotell, vil du også møte administrerande direktør i NHO, John G. Bernander og direktør for regional utvikling i SINTEF, Sigurd Kvernes.

Bedrifter som gjer ”gull av gråstein” er Njål Wiberg (Ask Adam), Stine Lilloe-Olsen (NordWest3D), Arild Bødal (Septic24) og Aud Ingrid Espeland (Fjord Invest Management).

Andre som skal delta om temaet ”smartare vekst” er stortingspolitikar Erling Sande, fylkesrådmann Jan Øhlckers, avdelingsdirektør NAV Arbeidssenter, Tove Rygg, rektor ved Høgskulen i Sogn og Fjordane, Åse Løkeland, professor ved Høgskulen, Erling Holden, adm.dir. Sparebanken Sogn og Fjordane, Arvid Andenæs og Tarje Bjørgum i Abelia.

Les meir på http://helenorge.nho.no/sognogfjordane/article.php?articleID=9016&categoryID=13